నూతన UDID కార్డు పొందాలనుకునే వారు తప్పనిసరిగా UDID పోర్టల్లో స్వయంగా లేదా మీసేవ కేంద్రాల ద్వారా దరఖాస్తు చేసుకోవాలి. దరఖాస్తు చేసిన అనంతరం వెయిటింగ్ లిస్ట్ ఆధారంగా వారికి స్లాట్ బుక్ చేయబడుతుంది. ఆ స్లాట్ వివరాలు మొబైల్ మెసేజ్ రూపంలో అభ్యర్థులకు అందించబడతాయి. అందులో సూచించిన తేదీ, సమయానికి నాగర్కర్నూల్ జిల్లా ప్రభుత్వ ఆసుపత్రిలోని రూమ్ నం.28లో హాజరుకావాలని అధికారులు సూచించారు.
ఇక ఇప్పటికే సదరం లేదా UDID కార్డు పొందిన వారు రెన్యూవల్ కోసం కూడా ఇదే విధంగా UDID పోర్టల్లో దరఖాస్తు చేసుకోవాలి. దరఖాస్తు సమయంలో మొబైల్ నంబర్ అప్డేట్ చేసి, PWD లాగిన్ ద్వారా “Renewal Card” ఆప్షన్ను ఎంచుకోవాలి. క్యాంపుకు హాజరయ్యే సమయంలో UDID Enrollment రసీదు, పాస్పోర్ట్ సైజ్ ఫోటో, ఆధార్ కార్డ్ జిరాక్స్ కాపీలు తప్పనిసరిగా తీసుకురావాలి.
జిల్లా ప్రభుత్వ ఆసుపత్రిలో వివిధ రకాల దివ్యాంగుల కోసం వేర్వేరు తేదీలలో క్యాంపులు నిర్వహించబడతాయి. శారీరక, మస్క్యులర్ డిస్ట్రోఫీ, CNS, సెరెబ్రల్, డ్వార్ఫిజం, పార్కిన్సన్ వంటి దివ్యాంగుల క్యాంపులు ఏప్రిల్ 7, 21, 28 తేదీలలో ఉదయం 10 గంటలకు జరుగుతాయి. వినికిడి మరియు మాటలోపం గల దివ్యాంగుల కోసం ఏప్రిల్ 8, 22 తేదీలలో క్యాంపులు నిర్వహిస్తారు. కంటి చూపు లోపం గలవారికి ఏప్రిల్ 6 మరియు 20 తేదీలలో, మానసిక దివ్యాంగులకు ఏప్రిల్ 8, 22 తేదీలలో క్యాంపులు ఉంటాయి. అలాగే తలసీమియా, హీమోఫిలియా, స్క్లెరోసిస్ దివ్యాంగుల కోసం ఏప్రిల్ 27న ప్రత్యేక క్యాంపు నిర్వహించనున్నారు.
క్యాంపులకు హాజరయ్యే వారు తమకు సంబంధించిన తాజా మెడికల్ రిపోర్టులు తప్పనిసరిగా తీసుకురావాలి. శారీరక వికలత్వం గలవారు ఎక్స్రేలు, స్కానింగ్ రిపోర్టులు, పక్షవాతం ఉన్నవారు MRI లేదా CT స్కానింగ్ రిపోర్టులు, వినికిడి సమస్యలు ఉన్నవారు PTI/BERA రిపోర్టులు, కంటి మరియు మానసిక వికలత్వం గలవారు సంబంధిత వైద్య నివేదికలను సమర్పించాలి. ఒరిజినల్ మరియు జిరాక్స్ కాపీలు రెండూ అవసరం. అవసరమైన రిపోర్టులు లేకపోతే సర్టిఫికేట్ ఇవ్వబడదని అధికారులు స్పష్టం చేశారు.
ఇప్పటికే సదరం సర్టిఫికేట్ పొందిన వారు ఆ సర్టిఫికేట్ జిరాక్స్ లేదా UDID ఒరిజినల్ కార్డు కూడా తీసుకురావాలని సూచించారు. జిల్లా గ్రామీణాభివృద్ధి అధికారి పి. చిన్న ఓబులేసు ఈ వివరాలను వెల్లడిస్తూ, అన్ని అర్హులైన దివ్యాంగులు ఈ అవకాశాన్ని వినియోగించుకోవాలని కోరారు.: నాగర్కర్నూల్లో ఏప్రిల్లో UDID/సదరం క్యాంపులు
