ఈ సందర్భంగా జిల్లా కలెక్టర్ బాదావత్ సంతోష్ బుధవారం కలెక్టరేట్లో విద్యార్థినులను అభినందించి సన్మానించారు. పట్టుదల, క్రమశిక్షణ, లక్ష్యసాధనపై దృష్టి పెడితే గ్రామీణ ప్రాంతాల బాలికలు కూడా అద్భుత విజయాలు సాధించగలరని ఈ ఫలితాలు నిరూపిస్తున్నాయని ఆయన అన్నారు.
ఇంటర్మీడియట్ మొదటి సంవత్సరం, ద్వితీయ సంవత్సరం పరీక్షల్లో బైపీసీ, ఎంపీసీ, ఎం.పి.హెచ్.డబ్ల్యూ విభాగాల్లో చదువుతున్న విద్యార్థినులు అత్యధిక శాతంలో ఉత్తీర్ణత సాధించడం మాత్రమే కాకుండా రాష్ట్ర స్థాయి ర్యాంకులకు సమానంగా నిలిచే మార్కులు సాధించడం అభినందనీయమని కలెక్టర్ పేర్కొన్నారు.
ఆర్థికంగా వెనుకబడిన గ్రామీణ కుటుంబాలకు చెందిన ఈ బాలికలు ఎన్నో అడ్డంకులను అధిగమించి సాధించిన ఈ విజయాలు విద్యా వర్గాల్లో ప్రశంసలు పొందుతున్నాయని తెలిపారు. కష్టపడి చదవడం, గురువుల మార్గదర్శకత్వం, కేజీబీవీ పాఠశాలల్లో అందిస్తున్న నాణ్యమైన విద్య ఈ ఫలితాలకు ప్రధాన కారణమని ఆయన వివరించారు.
ఈ విజయాల వెనుక ఉన్న ఉపాధ్యాయులు, ప్రత్యేక అధికారులు, తల్లిదండ్రుల సహకారం కీలకమని ప్రశంసించారు. జిల్లాలోని అన్ని కేజీబీవీ పాఠశాలల్లో ఇదే తరహా ఫలితాలు సాధించేలా చర్యలు తీసుకోవాలని విద్యాశాఖ అధికారులకు సూచించారు.
విద్యార్థినులు తమ విజయాన్ని ఆనందంగా జరుపుకుంటూ భవిష్యత్తులో మరింత కృషి చేసి ఉన్నత లక్ష్యాలను సాధిస్తామని తెలిపారు. జిల్లా విద్యాశాఖ అధికారి ఏ రమేష్ కుమార్ మాట్లాడుతూ, ఈ విజయాలు జిల్లాకు గర్వకారణమని, ఇతర విద్యార్థులకు స్ఫూర్తిగా నిలుస్తాయని అన్నారు.
ఈ కార్యక్రమంలో కేజీబీవీ పర్యవేక్షణా అధికారిని శోభారాణి, ప్రత్యేక అధికారులు, కార్యాలయ సిబ్బంది పాల్గొన్నారు.: నాగర్ కర్నూల్లో కేజీబీవీ బాలికల ఘన విజయం
