నీట్ ప్రశ్నాపత్రాల లీకేజీ వ్యవహారంలో కేంద్ర విద్యాశాఖ పూర్తిగా విఫలమైందని ఆయన విమర్శించారు. ఈ అంశంలో బాధ్యులపై కఠిన చర్యలు తీసుకోవాలని విద్యార్థులు, యువకులు, విద్యావేత్తలు పలుమార్లు డిమాండ్ చేసినప్పటికీ కేంద్ర ప్రభుత్వం స్పందించకపోవడం వల్ల పరిస్థితి మరింత తీవ్రమైందన్నారు.
విద్యార్థుల ఆందోళనలను అణిచివేయడానికి ప్రభుత్వం అనుసరించిన విధానం ప్రజాస్వామ్య స్ఫూర్తికి విరుద్ధమని ఆయన ఆరోపించారు. విద్యార్థులపై జరిగిన చర్యలు దేశ ప్రజలను తీవ్రంగా కలిచివేశాయని, అదే ప్రజాగ్రహానికి దారితీసిందని పేర్కొన్నారు. ఆ ప్రజా ఒత్తిడి కారణంగానే ధర్మేంద్ర ప్రధాన్ రాజీనామా చేయాల్సి వచ్చిందని ఆయన అభిప్రాయపడ్డారు.
ఒక నెల ముందే ఈ నిర్ణయం తీసుకుని ఉంటే ప్రధానమంత్రి నరేంద్ర మోడీ ప్రతిష్టకు మేలు జరిగేదని మర్రి జనార్దన్ రెడ్డి వ్యాఖ్యానించారు. రైతుల ఆందోళనల తర్వాత వ్యవసాయ చట్టాలను వెనక్కి తీసుకున్న పరిస్థితి మాదిరిగానే, అనేక మంది విద్యార్థులు నష్టపోయిన తర్వాత మంత్రి రాజీనామా చేయించడం ఆలస్యమైన నిర్ణయమని విమర్శించారు.
నీట్ వంటి జాతీయ స్థాయి పరీక్షల నిర్వహణలో కేంద్ర ప్రభుత్వం ఇకపై మరింత బాధ్యతగా వ్యవహరించాలని ఆయన కోరారు. పరీక్షల నిర్వహణలో పారదర్శకత పెంచేందుకు డిజిటల్ విధానాన్ని అమలు చేయాలని డిమాండ్ చేశారు.
బీఆర్ఎస్ పార్టీ విద్యార్థుల ఉద్యమాన్ని రాజకీయ ప్రయోజనాల కోసం ఉపయోగించకుండా వ్యూహాత్మకంగా వ్యవహరించిందని ఆయన తెలిపారు. విద్యార్థుల సమస్యలకు మద్దతు ఇస్తూనే ఉద్యమాన్ని రాజకీయ పార్టీలు హైజాక్ చేయకుండా ఉండాలన్న పార్టీ వర్కింగ్ ప్రెసిడెంట్ కేటీఆర్ సూచన రాజకీయ పరిణితికి నిదర్శనమని పేర్కొన్నారు.
కేంద్రంతో పాటు రాష్ట్ర ప్రభుత్వం కూడా ప్రజలకు ఇచ్చిన హామీల అమలు, ప్రజా సమస్యల పరిష్కారంలో మరింత అప్రమత్తంగా వ్యవహరించాలని మర్రి జనార్దన్ రెడ్డి సూచించారు.: ధర్మేంద్ర ప్రధాన్ రాజీనామా విద్యార్థుల ఉద్యమం విజయమే..