వనపర్తి: ప్రస్తుత నీటి లభ్యత, వర్షాభావ పరిస్థితులను దృష్టిలో ఉంచుకుని రైతులు ప్రాజెక్టుల కింద ఆరుతడి పంటలకు ప్రాధాన్యం ఇవ్వాలని రాష్ట్ర ఎక్సైజ్, పర్యాటక, సాంస్కృతిక శాఖల మంత్రి జూపల్లి కృష్ణారావు సూచించారు. వనపర్తి సమీకృత జిల్లా కార్యాలయాల సముదాయం సమావేశ మందిరంలో బుధవారం నిర్వహించిన ఉమ్మడి పాలమూరు జిల్లా సాగునీటి పారుదల సలహా మండలి సమావేశంలో ఆయన మాట్లాడారు.
జూరాల, భీమా, నెట్టెంపాడు, కోయిలాసాగర్, ఆర్డీఎస్, కల్వకుర్తి తదితర ప్రాజెక్టుల్లో నీటి లభ్యత, విడుదల, పంటల సాగుపై సమావేశంలో చర్చించారు. ఎల్నినో ప్రభావంతో వర్షాభావ పరిస్థితులు నెలకొన్నాయని మంత్రి తెలిపారు. ప్రస్తుతం ఉన్న నీటిని అన్ని అవసరాలకు సమన్వయం చేసుకోవాల్సిన పరిస్థితి ఉందన్నారు.
జూరాల ప్రాజెక్టులో సుమారు 9 టీఎంసీల నీరు అందుబాటులో ఉందని, ఇందులో సుమారు 7 టీఎంసీలను సాగునీటికి, 2 టీఎంసీలను తాగునీటి అవసరాలకు వినియోగించే అవకాశం ఉందని తెలిపారు. ప్రస్తుతం సాగులో ఉన్న పంటలకు డిసెంబరు వరకు నీటిని అందించాల్సి ఉన్నందున ప్రాజెక్టు కాలువల కింద అధిక నీటి అవసరమున్న పంటలను తగ్గించి ఆరుతడి పంటలకు ప్రాధాన్యం ఇవ్వాలని సూచించారు. మినుము, వేరుశనగ, ఆయిల్పామ్ వంటి ప్రత్యామ్నాయ పంటలపై రైతులకు విస్తృత అవగాహన కల్పించాలని అధికారులను ఆదేశించారు.
మంత్రి వాకిటి శ్రీహరి మాట్లాడుతూ.. నీటి లభ్యతపై వాస్తవ పరిస్థితులను రైతులకు ముందుగానే పారదర్శకంగా తెలియజేయాలని అధికారులను సూచించారు.
నాగర్కర్నూల్ జిల్లాలో ప్రత్యామ్నాయ పంటల సాగుపై రైతులకు అవగాహన కల్పిస్తున్నట్లు కలెక్టర్ హేమంత కేశవ్ పాటీల్ తెలిపారు. ప్రాజెక్టులు, రిజర్వాయర్లలో నీటి నిల్వలను ఎప్పటికప్పుడు అంచనా వేసి రైతులకు సమాచారం అందిస్తున్నట్లు చెప్పారు.
నాగర్కర్నూల్ ఎమ్మెల్యే డాక్టర్ కుచుకళ్ల రాజేష్ రెడ్డి, అచ్చంపేట ఎమ్మెల్యే డాక్టర్ వంశీకృష్ణ రైతులకు ఇబ్బందులు లేకుండా క్షేత్రస్థాయిలో చర్యలు తీసుకోవాలని కోరారు. సమావేశంలో ఉమ్మడి పాలమూరు జిల్లా ఎమ్మెల్యేలు, కలెక్టర్లు, నీటిపారుదల, వ్యవసాయ శాఖల అధికారులు, ప్రజాప్రతినిధులు పాల్గొన్నారు.
: రైతుల ప్రయోజనాలే లక్ష్యం..
