కళాశాల ప్రాంగణంలో ఏర్పాటు చేసిన యోగా శిబిరంలో ప్రముఖ యోగా శిక్షకుడు, నేషనల్ యోగా ప్లేయర్, ఎన్ఐఎస్ యోగా కోచ్ బి. సాగర్ విద్యార్థులకు యోగా సాధనపై అవగాహన కల్పించారు. ఆయన ఆధ్వర్యంలో పద్మాసనం, వజ్రాసనం, త్రికోణాసనం, భుజంగాసనం వంటి యోగాసనాలతో పాటు భ్రామరీ ప్రాణాయామం, అనులోమ-విలోమం వంటి శ్వాస వ్యాయామాలను సాధన చేయించారు.
ఈ సందర్భంగా ప్రతి ఆసనం వల్ల కలిగే ఆరోగ్య ప్రయోజనాలను వివరించిన బి. సాగర్, యోగా శారీరక ఆరోగ్యంతో పాటు మానసిక ప్రశాంతతను కూడా అందిస్తుందని తెలిపారు. నిత్యజీవితంలో యోగాను భాగం చేసుకుంటే ఒత్తిడి, ఆందోళన వంటి సమస్యలను అధిగమించవచ్చని సూచించారు.
కార్యక్రమానికి ముఖ్య అతిథిగా హాజరైన కళాశాల ప్రిన్సిపాల్ డా. కె. గీతాంజలి మాట్లాడుతూ యోగా భారతదేశం ప్రపంచానికి అందించిన గొప్ప వారసత్వమని పేర్కొన్నారు. “యోగాతో రోగం దూరం” అనే సందేశాన్ని ప్రతి ఒక్కరూ ఆచరణలో పెట్టాలని, రోజుకు కనీసం 30 నిమిషాలైనా యోగా సాధన చేయాలని సూచించారు. యోగా ద్వారా ఏకాగ్రత, మానసిక స్థైర్యం, శారీరక దృఢత్వం పెరుగుతాయని చెప్పారు.
విద్యార్థులు కూడా యోగా సాధన అనంతరం తమ అనుభవాలను పంచుకున్నారు. యోగా వల్ల మనసు ప్రశాంతంగా మారడంతో పాటు చదువుపై మరింత దృష్టి కేంద్రీకరించగలుగుతున్నామని తెలిపారు.
ఈ కార్యక్రమంలో కళాశాల వైస్ ప్రిన్సిపాల్, ఎన్ఎస్ఎస్ కోఆర్డినేటర్ కృష్ణయ్య, హెల్త్ క్లబ్ సభ్యులు, అధ్యాపకులు ధర్మ, హజీరా, అశోక్, కృష్ణ, నరేష్, బిల్కిస్ తదితరులు పాల్గొన్నారు. కార్యక్రమ నిర్వహణలో ఎన్ఎస్ఎస్ వాలంటీర్లు కీలక పాత్ర పోషించారు.: మానసిక ప్రశాంతతకు యోగనే మార్గం…