ఈ కార్యక్రమంలో బిఎస్పీ జిల్లా అధ్యక్షులు బోనాసి రాంచందర్ అడ్వకేట్, పార్లమెంట్ ఇంచార్జ్ పృథ్వీరాజ్, మాజీ జిల్లా ఇంచార్జ్ సి. కళ్యాణ్ పాల్గొన్నారు. వారు మాట్లాడుతూ విద్యుత్ ఆర్టిజన్లు కోరుతున్న ఐదు ప్రధాన డిమాండ్లు పూర్తిగా న్యాయమైనవేనని పేర్కొన్నారు. ముఖ్యంగా విద్యా అర్హత కలిగిన ఆర్టిజన్లకు ప్రమోషన్లు ఇవ్వడం, అన్ని ఉద్యోగులకు ఒకే విధమైన సర్వీస్ రూల్స్ అమలు చేయడం, అర్హులైన అవుట్సోర్సింగ్ మరియు కాంట్రాక్టు ఉద్యోగులను రెగ్యులర్ చేయడం వంటి అంశాలను ప్రభుత్వం తక్షణమే పరిష్కరించాలన్నారు.
చిన్న చిన్న సమస్యలను కూడా ప్రభుత్వం పట్టించుకోకపోవడం బాధాకరమని నేతలు ఆవేదన వ్యక్తం చేశారు. ఆర్టిజన్లు తమ హక్కుల కోసం పోరాడటం తప్పేమీ కాదని, ప్రభుత్వం స్పందించకపోతే పరిస్థితులు మరింత ఉద్రిక్తంగా మారే అవకాశం ఉందని హెచ్చరించారు. రాష్ట్ర ప్రభుత్వం వెంటనే చొరవ తీసుకుని ఈ సమస్యలను పరిష్కరించాలని వారు డిమాండ్ చేశారు.
ఇక రైతుల సమస్యలపై కూడా బిఎస్పీ నేతలు తీవ్ర ఆందోళన వ్యక్తం చేశారు. వ్యవసాయ మార్కెట్ను సందర్శించిన వారు రైతులు ఎదుర్కొంటున్న ఇబ్బందులను ప్రత్యక్షంగా పరిశీలించారు. రైతులు పండించిన ప్రతి మొక్కజొన్న గింజను ప్రభుత్వమే కొనుగోలు చేయాలని వారు డిమాండ్ చేశారు. ప్రస్తుతం ఎకరాకు 26 క్వింటాళ్ల పరిమితి విధించడం అన్యాయమని, ఆ సీలింగ్ను వెంటనే ఎత్తివేయాలని కోరారు.
మార్కెట్లో గోదాములు ఖాళీగా లేవని, లారీలు అందుబాటులో లేవని చెప్పి రైతులను ఇబ్బందులకు గురి చేయడం సరైంది కాదని విమర్శించారు. గత 15 రోజులుగా రైతులు మార్కెట్ యార్డుల్లోనే ఉండాల్సిన పరిస్థితి ఏర్పడటం ప్రభుత్వ వైఫల్యాన్ని స్పష్టంగా చూపిస్తుందని అన్నారు. గన్నీ బ్యాగులు సరిపడా అందించకపోవడం కూడా సమస్యలను మరింత పెంచుతోందని తెలిపారు.
తేమ శాతం కారణంగా ఆలస్యం చేయకుండా, ఇప్పటికే గన్నీ బ్యాగుల్లో నింపిన ధాన్యాన్ని వెంటనే మార్కెట్ నుండి తరలించాలని సూచించారు. అలా చేస్తే కొత్తగా వచ్చే రైతులకు అవకాశం కలుగుతుందని చెప్పారు. రైతులకు అవసరమైన యూరియా, విద్యుత్ సరఫరాలో ప్రభుత్వం విఫలమైందని, ఇప్పుడు ధాన్యం కొనుగోలులో కూడా అదే నిర్లక్ష్యం కొనసాగుతోందని మండిపడ్డారు.
రైతులు ఆరుగాలం కష్టపడి పండించిన పంటను కూడా ప్రభుత్వం కొనుగోలు చేయకపోతే వారి పరిస్థితి దయనీయంగా మారుతుందని ఆవేదన వ్యక్తం చేశారు. ఈ నేపథ్యంలో మార్కెట్ కమిటీ చైర్మన్ రమణరావుతో సమావేశమై రైతులకు ఇబ్బందులు లేకుండా తక్షణ చర్యలు తీసుకోవాలని కోరారు.
ఈ కార్యక్రమంలో పార్టీ నాయకులు జన్ను ఆంజనేయులు, మధు తదితరులు, ఆర్టిజన్లు మరియు రైతులు పెద్ద సంఖ్యలో పాల్గొన్నారు.: విద్యుత్ ఆర్టిజన్ల డిమాండ్లపై బిఎస్పీ ఆందోళన
