నాగర్కర్నూల్ నియోజకవర్గ పరిధిలోని తిమ్మాజీపేట మండలం బావాజీపల్లి గ్రామంలో మహాత్మా గాంధీ జాతీయ గ్రామీణ ఉపాధి హామీ పథకం (ఎంఎన్ఆర్ఈజీఎస్) కింద చేపడుతున్న చెరువు పూడికతీత, వండ్రు మట్టి తరలింపు పనులను జిల్లా కలెక్టర్ హేమంత కేశవ్ పాటిల్ బుధవారం ఉదయం ఆకస్మికంగా సందర్శించి పరిశీలించారు. పనుల పురోగతి, కూలీల హాజరు, మట్టి తరలింపు విధానం, రైతులకు అందుతున్న ప్రయోజనాలపై సంబంధిత అధికారులను అడిగి తెలుసుకున్నారు.
ఈ సందర్భంగా కలెక్టర్ మాట్లాడుతూ గ్రామీణ ప్రాంతాల అభివృద్ధిలో ఉపాధి హామీ పథకం కీలక పాత్ర పోషిస్తోందన్నారు. చెరువుల పునరుద్ధరణ, పూడికతీత వంటి పనుల ద్వారా గ్రామీణ ప్రజలకు ఉపాధి అవకాశాలు కల్పించడంతో పాటు వ్యవసాయ రంగానికి దీర్ఘకాలిక ప్రయోజనాలు చేకూరుతున్నాయని తెలిపారు. చెరువుల నుంచి వెలికితీసే సారవంతమైన వండ్రు మట్టిని రైతుల పొలాలకు తరలించడం వల్ల భూమి సారవంతం పెరిగి పంటల దిగుబడులు మెరుగుపడతాయని చెప్పారు.
చెరువుల పూడికతీత ద్వారా నీటి నిల్వ సామర్థ్యం పెరిగి వర్షాకాలంలో అధికంగా నీటిని నిల్వ చేసుకునే అవకాశం ఏర్పడుతుందని కలెక్టర్ తెలిపారు. దీనివల్ల భూగర్భ జలాలు పెరిగి పరిసర ప్రాంతాల రైతులకు సాగునీటి లభ్యత మెరుగుపడుతుందని పేర్కొన్నారు. ప్రభుత్వం చేపడుతున్న అభివృద్ధి కార్యక్రమాల ఫలాలు ప్రతి రైతుకు, ప్రతి గ్రామానికి చేరేలా అధికారులు సమన్వయంతో పనిచేయాలని సూచించారు.
ఉపాధి హామీ పనుల్లో నాణ్యత, పారదర్శకతకు అత్యంత ప్రాధాన్యత ఇవ్వాలని కలెక్టర్ అధికారులను ఆదేశించారు. కూలీల హాజరు నమోదు, మస్టర్ రోల్స్ నిర్వహణ, వేతనాల చెల్లింపులో నిర్లక్ష్యం ఉండరాదని స్పష్టం చేశారు. అలాగే పనులకు హాజరవుతున్న కూలీలకు ప్రభుత్వం నిర్ణయించిన వేతనాలు సకాలంలో చెల్లించేలా చర్యలు తీసుకోవాలని సూచించారు.
ఈ సందర్భంగా చెరువు పూడికతీత పనుల్లో పాల్గొంటున్న కూలీలతో కలెక్టర్ నేరుగా మాట్లాడి వారి సమస్యలను అడిగి తెలుసుకున్నారు. పని పరిస్థితులు, వేతనాల చెల్లింపులు, అందుతున్న సౌకర్యాలపై ఆరా తీసి, సమస్యల పరిష్కారానికి తక్షణ చర్యలు తీసుకోవాలని సంబంధిత అధికారులకు ఆదేశించారు.
ఈ తనిఖీ కార్యక్రమంలో జిల్లా గ్రామీణాభివృద్ధి శాఖ అధికారులు, మండల ప్రత్యేక అధికారులు, ఉపాధి హామీ సిబ్బంది, ప్రజాప్రతినిధులు, రైతులు, గ్రామస్థులు పాల్గొన్నారు.: బావాజీపల్లిలో ఉపాధి హామీ పనులను ఆకస్మికంగా పరిశీలించిన కలెక్టర్
